• Urretxuko batzar aretoan 2024ko Santa Anastasia jaietako egitaraua aurkeztu dute Udaleko ordezkari eta herriko eragileek. 3 asteburuz luzatuko den programa zabalak osatzen du jaia.

• Maialen Fidalgo “Irailaren 23an, Urretxuko kaleetan Euskal Jai eguna ospatuko dugu eta desfilea goizez izango da, besteak beste, eguna indartu eta bere biziraupena bermatzeko.”

  Arratsaldeko 18:00etan, Udaleko ordezkari eta herriko eragileak Udaletxeko areto nagusian elkartu dira 2024ko Santa Anastasia Jaietako egitaraua aurkezteko. Jon Luqui Alkateak bertaratuak agurtu ditu eta eskerrak eman dizkie urte guztian zehar egindako lanagatik. “Santa Anastasia Jaiak dira Urretxuarrak, eta kanpotik datozenak ere, urretxuarrago sentitzeko unea. Kalera irteten gara, plazak betetzen ditugu eta programa honetan jasota dauden jarduera eta ekitaldiez gozatzen dugu.”

   

  Aurten kontuan eduki behar diren gai hauek aipatu ditu Luquik “Jaietako zapia salgai egongo da kultur etxean irailaren 19ra arte. Interesatuta dauden establezimenduak udalarekin ahal dira jarri harremanetan eskuratzeko. Barrakak lizeoan egongo dira eta Autobus Zerbitzua Foru Aldundiaren laguntzaz emango da.”

   

   

  Egitarau borobila

  Larunbat honetatik aurrera, irailak 14, Urretxu musikaz eta kolorez jantziko da. Herri arteko XXXV. Folklore jaialdiarekin emango zaio hasiera festari. Goizeko 10etan, Areizaga plazan hasi eta egun guztian zehar luzatuko da, herriko hainbat gunetan ikuskizunak gozatzeko aukera egongo delarik. Egun berdinean, bolillo erakustaldia eta topaketa ere burutuko da, goizeko 10etan, Gernikako arbola plazan. Hurrengo egunean, irailak 15, bolo eta toka txapelketak ospatuko dira, emakumezko eta gizonezkoen kategoriatan banatuta, eta aldi berean, adineko pertsonen eguna izango dugu, 11.30ean hasi, bisita, omenaldi, meza, bazkari eta dantza lehiaketa izango dituena.

   

  Hurrengo asteburuan, irailaren 20an, arratsaldeko 17:00etan emango zaie jarraipena Gazte bidean piztu fest!-ekin. Ondoren, erraldoi kontzentrazioa, txaranga eta kalejira ibiliko dira Urretxuko kaleetan barrena. Arratsaldeko 20:30etan, pregoia eta txupinazioa, Santa Anastasia jaien hasiera ofiziala, burutuko da. “Santa Anastasia jaiek herriko elkarteen udalaren eta herriaren arteko lotura sakona erakusten dute. Hain zuzen ere, harreman horren garrantziaren erakusle dira aurtengo pregoilariak: San Martin Auzoko bizilagun taldea, urtetan, San Martin eguna ospatzeko lan egin duena; isilean, musutruk eta xume-xume lan asko egin duen taldea.” Azaldu du Maialen Fidalgok. Gaur horretan, 22:30ean, XI. HIP-HOP jaialdiak Madril, Sevilla eta Iruñeko raperoak hurbilduko dizkigu.

   

  Hurrengo egunean, irailak 21, goizeko 9:30etatik hasi eta eguerdi-arte abelborrien erakusketa, lehiaketa eta sari banaketa, asmatu txekorraren pisua, bertsolariak, poniak eta idi proba izango ditugu. 13:15etan Dantza saioa eta 16:00etatik aurrera 46. Gastronomia lehiaketa, txiki-chef, xake txapelketa eta idi proba. 19:30etan, txistularien alardeaz gozatzeko aukera izango dugu Iparragirre plazan, egitarau sendo eta anitz batekin. Jarraian, Gernikako Arbola plazan gastronomia lehiaketaren sari banaketa burutuko da. Eta eguna bukatzeko, Zatekeen Erromeria eta Bulego taldeen kontzertua.

   

  Igandean, irailak 22, baserritarrez janzteko eguna izango da, goizetik gauera. 10:00etan dianarekin emango zaio hasiera jaiari. Gernikako arbola plazan artisauen erakusketa eta azoka eta idi atonduak izango ditugu eta kaleetan zehar idi ibilaldia. Ohiturari jarraiki, 12etan meza nagusia San Martin de Tourseko elizan eta ordu berdinean, euskal jaia ibilaldiaren hasiera eta 12:30ean kantu poteoa herriko kaleetan zehar Goiargi abesbatzarekin. Arratsaldeko 14:00etan, karrozen harrera burutuko 18:00ak arte Labeaga kalean ikusgai egongo direlarik. Bazkari herrikoia 15:00etan izango da . Arratsaldean, karrozen sari banaketa eta ondoren kantu poteoa izango ditugu. Eguna amaitzeko, kandela piztea eta jarraian erromeria Puro Relajo taldearen eskutik.

   Fidalgok azaldu bezala, Euskal Jai egunean “12 koadrilak parte hartuko dute desfilean, azken urtetan izandako kopuru handiena izango dena; baina ez hori bakarrik, hamarnaka dantzari, hamabi idi pare, idi-zainak ere beste hainbeste; musikariak, boluntarioak, laguntzaileak eta langile ugari ibili dira eta ibiliko dira egun horren bueltan lanean, herritar guztiok egunaz gozatzeko aukera izan dezagun. Desfilea bakarrik ez, artisau azoka, idiak nola prestatzen diren ikusteko aukera, meza nagusia, musika kaleetan, herri bazkaria, erromeria, …. hamaika jardueraz gozatzeko aukera izango dugu egun horretan, eta bai, desfilea goizean izango da, besteak beste, eguna indartu eta bere biziraupena bermatzeko.” Eta gehitu du “urtero-urtero martxoan zein uztailean Urretxuko Festak antolatzeko elkartzen diren eragile zein herritarrek eta Udal honek lanketa bati ekin ziotelako pandemiaren aurretik. Hau, prozesu luze baten azken aurreko pausua delako; hurrengo urratsa izango da aurtengoaren balorazio zintzo eta garden bat egitea eta etorkizunera begira erabaki bat hartzea.”

   Hurrengo egunean, irailak 23, kuadrillen eguna ospatuko dugu. Goizeko 11:00etatik hasita haurrentzako parkea, moto eta patinete lasterketa, entzierroak eta jolasak, txaranga eta kuadrillen pisaketa eta izen-ematea izango ditugu. Herri bazkaria 14:30etan abenidan eta jarraian haurrentzako parkea eta sokatira. Arratsalde amaieran, 19:30etan, “Artistas del gremio” txaranga taldeak Urretxuko kaleak alaituko ditu. Eguna bukatzeko, dantzaldia eta kantu afaria izango ditugu.

   Egitarauarekin bere osotasunean amaitzeko, irailaren 29an, igandea, Urretxuko XXXI. MTB Trabesia izango dugu, goizeko 9:00etan, Iparragirre plazatik hasita.

    

  Talde ospetsuak Urretxun

  Maialen Fidalgok aipatu bezala, herriko festetan hainbat talde esanguratsuk joko dute, besteak beste, Bulego, Iratzar eta Puro Relajo.

   

Euskadiko Lurzoruari eta Hirigintzari buruzko 2/2006 Legeak xedatutako betez onartu eta argitaratzen dena.