Berriak
Aurtengo Urrelur astea urriaren 27tik azaroaren 2ra luzatuko da, baina lehenengo ekintza urriaren 25ean izango da irteera mineralogiko paleontologikoarekin.
Honako honen bidez jakinarazten da urriaren 16an 8:30etatik 11:30etara ura moztuko dela herriko hainbat eremuetan.
39 urte bete dira lehenengo edizioa egin zenetik eta urtez urte sendotzen joan da. Asko dira bertatik pasatako taldeak eta entzundako kontzertuak. Zikloaren jarraitzaileak ere asko dira eta irrikaz hartzen dute saio bakoitza.
Vitor S. Mendonçak bere lana aurkeztuko digu urriaren 17tik azaroaren 2ra Juan de Lizarazu aretoan.
KARRANTZA – POZALAGUA – EL KARPIN: GRABITATEARI AURRE EGINEZ. Naturaren zirrara beste inon ez bezala azaltzen da Karrantzako Pozalaguan kobazuloan. Ikuskizun bakarra ezkutatzen du haitzuloak: forma imajinaezinak hartzen dituzten estalaktita eszentrikoen pilaketarik handiena.
Urretxuko +65 Foroak “Sexualitatea”-ri buruzko zineforuma antolatu du urriaren 23rako.
Antxiñe Mendizabalek "Katona" bere bigarren eleberria aurkeztu du Urretxuko kultur etxean, komunikabideen aurrean.
‘Lauso ala pauso?’. Aurten ere galdera batekin abiatuko da hirugarrenez Sormonak nerabeei zuzendutako sormen prozesuan/lehiaketan. Galdera iradokitzaile horrekin parte hartzea argi ez duten ala aurrekoetan argi izan ez duten nerabeak aktibatu nahi ditu Urretxuko Udaleko Gazteria Sailak, pausoa eman eta aurkez daitezen. ‘Zer da egin nahi duzuna?’ galdera ere badakar esku-orriak, egin nahi duen hori egiteko aukera eskaintzen baitie Sormonak-ek, sormena artearen eta kulturaren esparruan ez ezik, gainerako esparrutan ere ulertuta. Hala, aurreko bi aldietan askotariko proiektuak aurkeztu eta saritu dituzte.
Sormonak-en hirugarren aldi honetan ere, sormena garatzeak osasunean, ongizatean eta garapenean duen onurez jabetzeko indarra egin nahi du Urretxuko Udalak. Horretaz gainera, nerabezaroaren ikuspegi positiboa ere zabaldu nahi du, ohiko estereotipoei aurre eginez. Aurrekoetan bezala, lehiaketa ere izango da, baina batez ere prozesu bat izango da: parte hartzaileek sortu nahi duten hori garatzeko baliabideak eta inguruko zein Euskal Herriko adituen laguntza izango dute. Lan originalak zein beste lan batzuetan oinarritutakoen bertsioak aurkeztu ahalko dira, zeinahi esparrutakoak: kultura eta arte esparrukoak izan daitezke, baina baita beste esparrutakoak ere. Prozesua bera sariak baino aberasgarriago izan dadin nahi luke Urretxuko Udalak.
Bi berrikuntza oinarrietan
Izen ematea astelehenean, irailaren 29an zabalduta, urriaren 17ra arteko epea izango da ideiak aurkezteko labur.eus/SMNK2025 helbidean. Behin proiektuak aurkeztuta, ideiak aurkeztuta baliabideak eskatzeko epea zabalduko dute urriaren 20tik aurrera, eta, baliabideak eskuratuta, urtarrilaren 16a baino lehen aurkeztu beharko dituzte lanak. Prozesu osoan zehar Gazteria Sailaren laguntza izango dute, eta, behar izatera, baita komunitateko eta kanpoko adituena ere.
Sari banaketa ekitaldia otsailaren 12an egingo, Pagoeta Gune Soziokulturalean, aurten ere. Ekitaldi horretan aurkeztutako lanez gozatzeko aukera izango da. Prozesuan parte hartu duten adituek lanik berezienak hautatuko dituzte egun horretarako lau kategoriatan: banaka, lan original bereziena; taldeka, lan original bereziena; bakarka, lan eratorri bereziena; taldeka, lan eratorri bereziena. Guztiek 200 euroko saria jasoko dute, proiektuari lotutako produktuetan, emanaldietan edota zerbitzuetan baliatzeko, bailaran edota Euskal Herrian.
Parte hartzeko oinarriak aurreko urteetako beretsuak izango dira, baina bi berrikuntzekin: batetik, Adimen Artifiziala baliatuz gero aitortu egin beharko da; bestetik, baliabide materialak behar diren kasuetan, komunitateko saltokietan eskuratu daitezkeen baliabideekin egindako lanak lehenetsiko dira saritzeko eta Erasmus+ programan parte hartzeko.
Erasmus+ programa lantzen
Urretxuko Udaleko Gazteria Saila Erasmus+ programarako proiektua lantzen ari da Wiesbadeneko (Alemania) Udalarekin, aurten Schwarzenbruckekin bezala, datorren urtean Wiesbadeneko nerabe talde batekin elkartrukea egin ahal izan dezaten 15 lagunek. Behin Europako diru-laguntzak esleituta zehaztuko dute hautaketa prozesua nola egingo duten bi udalek.
