Abentura eta kirola ditu eskaintzak oinarri, herrian zein herritik kanpo

Urretxuko Udaleko Gazte Bidean nerabeentzako zerbitzuak eskaintza indartsua eta zabala antolatu du Aste Santurako. Hala definitu du Gazteria Sailak ondutako eskaintza Maialen Fidalgo Mendizabal Herritarren Batzordeko zinegotziak, eta erantsi du ez dela kasualitatez, nerabeen zerbitzuak ikasturte honetan izan duen eraberritzearen ondorio dela baizik.

Gazte Bideaneko erabiltzaileengandik eurengandik sortutako eskaintza izan dela ere nabarmendu du zinegotziak, izan ere, euren ekarpenez osatu dute eskaintza. Hala, zerbitzuaren bitartez ere nerabeen parte hartzean sakondu nahi du Urretxu Udalak, beste hainbat ekimenen bitartez egiten duen bezala. Gozamenetik eta gozamenerako osatutako eskaintza hezitzailea da, oporraldiaz herrian zein herritik kanpo gozatzeko balio izango diena.

Abentura eta kirola izango ditu oinarri eskaintzak. Lau irteera izango dira orotara: Mendexako Abentura Park-era (martxoaren 25ean), Donostiara hondartza-boleia (martxoaren 27an), Iruñeko saltingera (apirilaren 4an) eta Olaberriko Kartingera (apirilaren 5ean). Abenturak eta kirolak, ordea, herrian eta naturguneetan ere izango dute lekua: Irimon konkis egingo dute (martxoaren 26an), Padel txapelketa (apirilaren 2an) eta Scape Room-a Gazte Bideanen (apirilaren 3an). Horietarako guztietarako izen ematea zabalik da ostiralera bitartean, eta ekintza batzuetarako izen ematea betetzear ere bai. Izan ere, hainbat ekintzek pertsona muga baitute. Informazio zabalagorako edota izena emateko, Gazte Bideanera jo behar da arratsaldez.