Urola Garaiko Mankomunitateak kirol elkarteetan euskararen erabilera indartzeko esku-hartzeak aurkeztu ditu

Urola Garaiko Mankomunitateak kirol elkarteetan euskararen erabilera handitzeko esku-hartze zehatzak aurkeztu ditu. Azken urteetan egindako ikerketa kuantitatiboen eta iazko ikerketa kualitatiboaren bitartez bildutako ondorioetan oinarrituta, hiru esku hartze zehatz landu dituzte udaletako teknikariek, EMUN kooperatibaren bitartez. EMUNeko Mikel Perezek hiru ardatzetan bereizi ditu datozen egunotan abiatuko diren esku-hartzeok:

• Euskara mikroplanak 3 klubetan: diagnostikoak oinarri, hiru elkarteri EMUN aholkularitza kooperatibaren laguntza eskainiko zaie, euren elkartean euskara plana egin eta euskararen erabilera areagotzeko helburuz.
• Kirol mahaia: eskualdeko kirol elkarte guztiei urtean bitan deituko zaie euskararen erabileraren harira izaten ari diren esperientzia partekatu eta baliabideekin laguntzeko.
• Kirol elkarte guztiei “euskara eta kirola” gai hartuta lau mezu bidaliko zaizkie aurten euren elkartean -entrenatzaile, guraso- zabaltzeko.

Urretxuko Udaleko portaloian, Mankomunitateko udal guztietako zinegotziek babestuta, Jon Luqui lehendakariak 2019tik hona egindako lanen berri eman du: hiru katalogo argitaratu dira eskualde mailan euskaraz entrenatzen duten 16 urtez azpiko kirolarien taldeekin, katalogo horiek etxe guztietara paperean zabaldu, Goierriko Hedabideekin gehigarri bihurtu eta bideoen bidez ere zabaldu dira. Azken udazken honetan, aldiz, euskararen inguruko jarrerak bildu nahi izan dira elkarrizketa eta momentu parte-hartzaileen bidez.

Halaber, eskerrak eman dizkie elkarte eta entrenatzaile guztiei orain artean Kirolean euskaraz proiektuaren alde egindako ahaleginarengatik, aitortza ere jaso baitu elkarlanean eginiko lanak: otsailean Jaurlaritzaren Kiroletik bagoaz euskaraz sarietan aipamen berezia jaso zuen. Mankomunitatetik aurrerantzean ere baliabideak eskaintzen jarraitzeko prest daudela adierazi du.