17 eta 24 urte bitarteko gazteei zuzendutako bi tailer eskainiko ditu, lehen fase honetan: ongizate emozionalari buruzko oinarrizko ikastaroa eta antsietateari buruzkoa

Ongizate emozionalaren zaintzaren beharrak gizartean indarra hartu duen honetan, Urretxuko Udalak gaiari heldu nahi izan dio, eta 17 eta 24 urte bitarteko gazteei prestakuntza eskainiko die apirilean eta maiatzean egingo dituen bi saioren bitartez. Gazteria Sailak Gipuzkoako Foru Aldundiarekin elkarlanean abiatuko du gazteen ongizatea lantzeko bidea, eta Treba Gazteak programaren baitako Ongizate emozionala: oinarrizko eta Ongizate emozionala: stop antsietatea ikastaroak izango dira lehen urratsak.

Ongizate emozionala: oinarrizko ikastaroa apirilaren 11n izango Urretxuko kultur etxean, 17:00etatik 20:00etara. Ainhoa Urretagoiena adituak nork bere burua ezagutzen eta maitatzen ikasteko ikastaroa eskainiko du: “Gazteen ahalduntze-prozesuetan onarpen pertsonalak berebiziko garrantzia du; aurrera egin ahal izateko lehen pausoa norberaren burua ezagutu eta maitatzen ikastea da”. Hala, izena ematen dutenek ongizate emozionala bermatzeko oinarriak ikasiko dituzte eta autoezagutzari buruzko lehen pausoak emango dituzte. Izena gip.eus/dqbrl helbidean eman behar da.

Ongizate emozionala: stop antsietatea, berriz, ikastaroa, maiatzaren 24an izango da, leku berean 10:00etatik 13:00etara bitartean. BadaBideBat zerbitzu entzutetsuak eskainiko du, gazteei euren zailtasunei aurre egiten eskaintzen dien elkartea da. Antsietate egoeren prebentzioa landuko dute ikastaro honetan, gazteei antsietatea ezagutzen eta kudeatzen lagunduko dieten ezagutzak eta tresnak eskainiko dizkiete. Izen ematea aurki zabalduko dute.

Gazteen ongizatea helburu

Gazteen ongizate emozionalaz hitz egitea, gazteen ongizateaz hitz egitea da. Horretarako tresnak eskaintzeko bidea abiatu du, era horretara, Urretxuko Udaleko Gazteria Sailak. Orokorretik abiatu badu ere, bigarren ikastaroan nola, zehaztasunerantz egin nahi du bidea, eta komunitateko gazteek ongizate emozionalari buruzko behar zehatzak landu, zabaltasunean baino. Lehen fase honetan, bi saio horiek eskainiko ditu, eta beharrak detektatu ahala, gehiago ere izango dira aurrerantzean.