Sormena ez ezik, beste herrialde bat adin bertsuko kideen bitartez ezagutzeko aukera izango dute
Ostiral honetako, gaueko 4:30ean, abiatuko da 18 laguneko taldea Schwarzenbruckera, udalen arteko Erasmus+ programaren bitartez. Urretxuko Udaleko Gazteria Sailak koordinatutako ekimen honetan, 15 neraberekin batera hiru arduradun joango dira, eta eguerdi aldera, Schwarzenbruckera iritsitakoan, beste 18 laguneko taldeak egingo die harrera bertan.
Guztiek astebeteko egonaldia egingo dute bertan. Sormonaken azken aldian parte hartu, proiektua aurkeztu eta interesa agertu zuten 41 lagunen arteko zozketaren bidez aukeratu dira partaideak, genero oreka aintzat hartuta. 14 eta 18 urte bitarteko nerabeak dira. Izan ere, Urretxuko Gazteria Sailak Europara aurkeztutako elkartrukearen ardatza sormena da: ez arteari edota kulturari dagokionez bakarrik, baita bestelako askotariko esparruei lotuta ere. Hala, astebeteko egonaldian, sormenari lotutako askotariko ekintzak egingo dituzte elkarrekin: besteren artean, arte eta diseinuari buruzko edota teknologiari buruzko bisitak eta tailerrak egingo dituzte museoen, kultur elkarte, enpresa eta beste erakunderen bitartez.
Sormena ez ezik, Schwarzenbruck eta Nurenberg inguruetako historia, kultura eta naturguneak ezagutuko dituzte, bertako adin bereko biztanleen eta bi hirietako elkarte eta eragileen eskutik. Hori guztiori era ludiko eta gozagarrian egingo dute. Eta nola ez, bi taldeak elkar ezagututa, aisialdirako eta gozamenerako esperientziak eta tarte libreak ere izango dituzte.
Urretxuko Udalaren webgunean egunez eguneko jarraipena egingo dute, eguneko argazkien eta testu laburren bitartez.
Senidetutako bi herrien zubigileak
Maialen Fidalgo Mendizabal · Herritarren Batzordeko zinegotzia
Gaur agurtuko ditugun 15 gazte hauek, eta udazkenean handik etorriko diren 15ak izango dira bi herrion arteko harremana bizirik mantendu bakarrik ez, indartu eta berrabiaraziko dutenak.
Harreman horren hazia Urretxuar batek jarri zuen, Alemanian bizi zen Alfonso Cuestak, 1988an, bi herriok, Urretxu eta Schwarzenbruck elkar ezagutzera eman zituenean eta senidetzaren aldeko lanari ekin zionean. Lan horren ondorioa izan zen 1991n bi herriek sinatutako senidetza hitzarmena, Albert Frister eta Ramon Arbizu alkateek sinatu zutena.
Harrez geroztik, hamaika joan-etorri egin dituzten urretxuarrek Alemaniara eta schwarzenbruckarrek Urretxura: kirol txapeleketetara, Hizkuntza ikastera, ekitaldi kulturaletara, lanera, eta nola ez, jaietara ere bai. 90eko hamarkada oso emankorra izan zen zentzu horretan, eta elkartruke ugari egin ziren, bereziki gazteen artean, eta gaurdaino dirauten harreman pertsonalak sortu ziren. Ostiralekoarekin, garai hartakoa bezain emankorra izango den etapa bati hasiera eman nahi diogu.
90. hamarkada oso emankorra izan zen zentzu horretan, eta elkartruke ugari egin ziren, bereziki gazteen artean, eta gaurdaino dirauten harreman pertsonalak sortu ziren. Ostiralekoarekin, garai hartakoa bezain emankorra izango den etapa bati hasiera eman nahi diogu.