Udaberriko- udako bi klasiko handi bueltan dira: Urretxu Zumarragako lore sariketa eta pintura lehiaketa.

Lore sariketak hogeita hamaseigarren edizioa du aurtengoa. Urretxu eta Zumarragako kale eta baserri-atariak atontzen zituzten haiek saritzeko bokazioarekin sortu zen, gure herriak ederrago eta atseginago egiteak ere sari edo errekonozimendu bat merezi duelako. Urteen poderioz, leiho eta baserri-atariak kolorez eta usan goxoz betetzeko ohitura hori mantendu bakarrik ez, areagotu egin da gure herrietan, eta hala 36. edizio honetara iritsi da, bizirik eta indartsu.

 Lehiaketaren nondik-norakoak errazak dira, ekainaren 10ean hasi eta 21era arte epaimahaiak Urretxu eta Zumarragako kale, auzo eta baserriak bisitatuko ditu eta ederrenak iruditzen zaizkien haiek aukeratuko. Ondoren, uztailaren 12an Urretxuko portaloian irabazleei 50 euroko saria, diploma eta oparia emango zaizkie; 10 sari kaletarrei eta beste 6 baserritarrei.

 Helburua ez da lehia bultzatzea, baizik eta herritarrak Urretxu eta Zumarraga apaintzera gonbidatzea eta animatzea.

 Bigarren lehiaketak, pintura lehiaketak,  berriz, 35urte beteko ditu aurten, 35 urte  eta 30 edizio herritarren sormena eta adierazpen artistikoa sustatzen, talentua saritzen eta artista berriei aukerak eskaintzen.

 Aipatu moduan, lehiaketa 1989an jarri zen martxan eta garai hartan urtero egiten zen; denborarekin ordea, ikusi zen kalitatezko lanak jaso, aztertu eta herritarrei erakusteko ere denbora behar zela, eta beraz, egokiagoa zela lehiaketa bi urtero egitea. Hala, lanak jaso eta sariak emateaz gain, aurkeztutako margoak Juan de Lizarazu Aretoan egongo dira, bertaratzen diren herritar guztiek ikusteko eta gozatzeko aukera izan dezaten.

 Aipatu moduan, lehiaketa bi urtetik behin antolatzen da orain.  Aurten, zehazki irailaren 2tik 13 bitartean auzkeztu beharko dira lanak, Urretxuko kultur etxean. Ondoren, epaimahaiak horiek aztertuko ditu eta bere erabakiaren berri emango du urriaren 4an, Juan de Lizarazu erakusketa aretoan. Bertan ezagutuko dira irabazlea, 800 euroko saria izango duena, bigarrena, 600 euro, eta herriko lan onena, 300 euroko sariarekin.

 Lehiaketa irekia da eta interesa duten haiek Urretxuko zein Zumarragako Udaleko webgunetan topatuko dituzte oinarriak eta gainerako xehetasunak.

Lore sariketa Oinarriak

Pintura lehiaketa Oinarriak