Zainketen Tokiko Ekosistema udal, eskualde eta lurralde mailako gizarte eta osasun zerbitzuak biltzen dituen estrategia bat da, arreta pertsonalizatua eskaintzeko helburuarekin, eragile komunitarioen laguntzarekin. Bost dimentsio ditu, eta hemendik aurrera udal eraikin ezberdinetan jarritako bost panel didaktikotan irudikatuta egongo dira.

Urretxuko eguneko zentroan egin dute aurkezpena, eta bertan izan dira Gipuzkoako Foru Aldundiko, Urretxuko Udaleko, Uggasa eskualdeko agentziako eta Goierri-Urola Garaiko ESIko ordezkariak.

Bost dimentsioak azaltzeko asmoz, Udaleko teknikarien testigantza jaso da, eta, erabiltzaileekin batera, panel horietan aurkezten diren ekintzak nola garatzen ari diren erakusten duten adibide errealak eman ahal izan dituzte.

Zaintza Herrilab, Urretxuko zaintza eredu berriaren hazia

Ekosistema bertakoa da, Urretxukoa berezkoa, eta gure udalerriaren beharrei eta ezaugarriei erantzuten die, baina ez da bakarra eta ez dago isolatuta. Ekosistema Gipuzkoako Foru Aldundiaren babespean sortu eta hazten da, zehazki Foru Aldundiak eta Adinberri Fundazioak gidatzen duten Zaintza Herrilab ekimenaren barruan.

Zainketen transformazioa

Zaintza eta Gizarte Politiketako diputatuak, Maite Peñak, Gipuzkoako Foru Aldundiak Adinberrirekin lankidetzan bultzatutako Zaintza HerriLab estrategiaren aurrerapena nabarmendu du Urretxun. Peñaren arabera, ekimen honen helburua etorkizuneko zainketak eraldatzea da, "adinekoen nahi eta etxeetara hurbilduz eta gizarte-, osasun- eta komunitate-zerbitzuekin etengabeko arreta integratua bermatuz. Urretxuk pertsonak eta haien beharrak erdigunean jartzen dituen eredu berritzaile honetan murgiltzen du".

Peñak azpimarratu zuen Zaintza HerriLabek mendekotasunaren prebentzioa eta zaintzaileentzako laguntza ere jorratzen dituela, autonomia pertsonala bultzatuz: "Arreta jarri behar diegu pertsonen nahiei. Adineko gehienek etxean geratu nahi dute, eta Zaintza HerriLab estrategiak nahi horri erantzun nahi dio arreta hurbilagoaren eta pertsonalizatuaren bidez, ikuspegi holistiko eta lurraldekoi batekin, baina betiere tokiko esperientzietatik abiatuta ".

5 panel eredu berria ezagutzeko

Urretxuko Zaintza Ekosistema Lokalak bost dimentsio ditu. Eskema hori bera erabiliz, udalerri osoan zehar banatutako eraikin publiko estrategikoetan ikusgai egongo diren panelak diseinatu dira.

Lehenengo panela, PREMIA BERRIAK ASETZERA BIDERATUTAKO EREDU BERRI BAT

Lehenengo panelak gizarte-zerbitzuen kudeaketan egin den aldaketa handia erakusten du "eredu honekin, zerbitzu-zorrotik datozen zerbitzuak kudeatzetik kasuak bere osotasunean kudeatzera igaro gara, kasuen kudeaketa izeneko metodologia erabiliz. Horrek esan nahi du ikuspegi integral batetik lagundu behar dela pertsonek laguntza pribatuak zein publikoak jaso ditzaten, gizarte-, osasun- edo komunitate-izaerakoak izan. " Maialen Fidalgo Urretxuko Udaleko zinegotziak azaldu duenez.

Formula berriak pertsonaren ikuspegi zabalago eta gizatiarrago bati erantzuten dio. Maialenek zehaztu duenez, "arreta-eredu berri honekin ez gara pertsona batek duen mendekotasun-mailan bakarrik zentratzen, baizik eta ulertzen dugu pertsona guztiek dutela eskubidea beren erabakiak hartzeko, kalera irteteko, gizarte-harremanak izateko, etab. Horrela, zerbitzuaren hartzaileen nahiak eta gustuak errespetatzen dira eta zainketak pertsonalizatzen dira. Laburbilduz, pertsonei bizitza duina mantentzen laguntzen diegu, etxean bizitzen jarrai dezaten. Hori zerbitzu eta proiektu zehatzetan gauzatzen da, hala nola Pagoetako adinekoentzako apartamentu berriak, 2025ean prest egongo direnak, lantzen ari diren Eguneko Arreta Zerbitzua, Urretxuko Eguneko Zentroa edo Etxez etxeko Arreta Zerbitzua, besteak beste.

Teoriatik ekintzetara pasatzeko, Pilar Angulok, eguneko zentroko eta etxez etxeko laguntza-zerbitzuko erabiltzaileak, eta bere alabak eredu berri horrek izapideetan eta giza tratuan ekarri duen aldaketa azaldu dute.

Bigarren panela, ELKARLANEKO GOBERNANTZA

Almudena Carrillok, Urretxuko Udaleko gizarte zerbitzuen koordinatzaileak, dime berri hau zertan datzan azaldu du. "Bi lan-ardatzen gainean eraikitzen da; lehenengoa, koordinazio soziosanitarioa, osasun- eta gizarte-sistemako profesionalen arteko komunikazioa eta koordinazioa sustatzen duena, eta, aldi berean, bi sistemen arteko hobekuntza- eta koordinazio-bideak identifikatzen laguntzen duena, eta, bigarrena, gobernantza soziala." Almudenak azaldu duen bezala, "hemen kokatzen ditugu proiektu komunitarioenak, hala nola, besteak beste, nahi ez den bakardadearen aurkako boluntariotza edo +65 Foroa, beren ongizatera bideratutako politiken eta jardueren plangintzan, betearazpenean eta jarraipenean parte hartzen duten pertsonen ordezkaritza-organoa, zahartze-ereduei eta abarrei buruzko eztabaidara eta hausnarketara bideratutako ekimenekin, eta pertsonen sozializazioa bultzatzen duten ludikoagoak diren beste batzuekin, hala nola yoga-klaseekin."

 Hori azaltzeko, Cecilia Álvarezek eta bere seme Adolfo Ruizek hitz egin dute. Biak +65 Foroko yoga klaseetan izan dira, eta euren esperientzia kontatu dute.

 

Hirugarren panela: BERRIKUNTZA SOZIALA ETA TEKNOLOGIKOA

Hainbat proiektu biltzen ditu, gaur egun bi nabarmentzen direnak, baina etorkizunean gehiago batu daitezkeenak.

Alde batetik, URRETXUN ZAINDU. Udalak 2 urte daramatza hori bultzatzen. Proiektuak hauskortasun- edo mendekotasun-egoeran dauden adinekoak zaintzen laguntzen du, etxean iraun dezaten, baina baita zaintzaileei laguntzen ere. Teknologiaren eta zerbitzu telematikoen eta aurrez aurreko arretaren arteko konbinazioa da. "APParen bidez, erabiltzaileen jarraipena eta gida egiten da, haien etxeetara bisitak eginez eta etengabe harremanetan egonda."

Bigarren proiektua, UROLA GARAIA ZAINTZA LAB, eskualdeko proiektu bat da, Urola Garaia mailan, orto protesikoan, laguntza teknikoetan eta neuro-errehabilitazioko sistema aurreratuetan oinarrituz, etxean zaintza berritzaileak ematea ahalbidetzen duen arreta-eredu batean berritzea helburu duena.

 Jon Luqui eskualdeko garapen-agentziako presidente eta proiektu honen sustatzaile nagusiak adierazi duenez, "duela hilabete gutxi proiektuaren emaitzak ezagutu genituen eta proiektuan parte hartu zuten eta bizi-kalitatea nabarmen hobetu duten pertsona batzuen testigantzak entzun genituen".

 

Laugarren panela, IKASKUNTZA ETA LANKIDETZA

"Hasieran esan genuen, eta gero diputatuak azaldu zuen, ekosistema ez dela bakarrik sortzen eta ez dela hazten, baizik eta Zaintza Herrilab sarearen parte dela, sorkuntza bultzatzeaz gain, eboluzioan eta hazkundean laguntzen digulako, beste udalerri batzuekin ekimenak eta esperientziak partekatzen ditugulako, eta Aldundiak berak ere jarraipena egiten duelako eta babesa ematen digulako." Udaleko ordezkariak azaldu du.

 

Bosgarren panela, EBALUAZIO SISTEMATIKOA

Neurtzen ez dena ez da hobetzen, "horregatik, ebaluazio hori egiten laguntzen diguten adierazle batzuk prestatu ditugu – bitarteko lehen ebaluazioa egin berri dugu –, eta horretan oinarritzen gara ekimenak ezabatu, aldatu eta txertatzeko."

Topaketa amaitzeko, eguneko zentroko panelak eta erabiltzaileak bisitatu dira.