Urretxuko Udalak eguzki-argiak jarri ditu Pagoeta auzoan

Etxebizitzetarako sarbidea eta udal igerilekuetarako igoera argiztatzeko hobekuntza

Urretxuko Udalak eguzki bidezko argi berriak jarri ditu Pagoeta auzoan, zehazki udal igerilekuetarako igoeran dauden etxebizitzetarako sarbidean. Jarduketaren helburua da segurtasuna eta ikusgarritasuna hobetzea, batez ere gaueko ordutegian, auzotarrek maiz erabiltzen duten gune batean.

Neurria udal aurrekontuen parte-hartze prozesuan auzotarrek egindako eskaerari erantzunez gauzatu da.

Parte-hartze gune horietan herritarrek tarte horretan argiteria hobetzeko beharra adierazi zuten, eta eskaera hori orain gauzatu da.

Jarduketaren bidez eguzki-energiadun argi autonomoak jarri dira, sare elektrikora konektatu beharrik gabe ingurunea argiztatzeko aukera ematen duen irtenbide eraginkor eta jasangarria. Sistemak egunean zehar eguzki-energia metatzen du, gauez funtzionamendua bermatzeko, energia-kontsumoa eta ingurumen-inpaktua murriztuz.

Obra zibila eta zutoinen zein argien hornidura barne hartuta, inbertsioa 12.500 eurokoa izan da.

Esku-hartze honen bidez, Udalak oinezkoen segurtasuna indartu du malda duen eta erabilera handikoa den tarte batean, bai auzotarren artean, bai udal kirol instalazioen erabiltzaileen artean.

Eguzki-argien instalazioa udal argiteria pixkanaka hobetzeko, jasangarritasun energetikoa sustatzeko eta herritarren parte-hartzea erabaki publikoetan indartzeko konpromisoaren baitan kokatzen da.

Urretxuko Udalak herritarrekin elkarlanean jarraituko du udalerriko auzo desberdinen beharrak artatzeko, bizi-kalitatea eta hiri-ingurunea hobetzen dituzten jarduketak sustatuz.