Urretxuk Gobernantza Bikaintasunaren Europako Zigilua (ELoGE) lortu du

Urretxuk Gobernantza Bikaintasunaren Europako Zigilua (ELoGE) lortu du, Europako Kontseiluak ematen duen aitortza, udalaren kalitate demokratikoarekiko konpromisoa, herritarren parte-hartzea eta kudeaketa publikoaren etengabeko hobekuntza nabarmentzen dituena.

Urretxuko Udala Europako udalerri erreferenteen talde hautatuan sartu da, eta Euskadin aintzatespen hori lortu dutenen artean biztanleria txikieneko udalerrietako bat da.

Urretxuko Udalak Gobernantza Bikaintasunaren Europako Zigilua (ELoGE) jaso du, tokiko erakundeen gobernantza ona, gardentasuna eta jasangarritasuna balioesten dituen bereizgarria. Zigilua 2026ko otsailaren 5eaneman zen EUDELen Bilboko egoitzan egindako ekitaldi instituzionalean, Europako Kontseiluko, EUDELeko eta euskal erakundeetako ordezkarien aurrean, baita saritutako udalerrietako alkateen parte-hartzearekin ere.

Ebaluazio zorrotza eta emaitza sendoak

ELoGE Zigilua ebaluazio sakon baten ondoren ematen da. Prozesua gobernu onaren 12 printzipiotan egituratutako 72 adierazletan oinarritzen da, eta besteak beste aztertzen ditu: herritarren parte-hartzea, gardentasuna, segurtasun juridikoa, epe luzeko plangintza eta baliabide publikoen kudeaketa arduratsua.

Urretxuk balorazio bereziki ona lortu du hiru ardatz nagusitan:

• Parte-hartze demokratikoa, herritarrekin batera erabakiak hartzeko bideak sendotuz;

• Plangintza, udal politika koherenteak eta aurreikusgarriak garatuz;

• Garapen jasangarria, pertsonen ongizatea eta ingurumenaren zaintza uztartuz.

Jon Luqui Urretxuko alkatearen hitzetan:

“Gure kasuan, oso emaitza ona lortu dugu parte-hartze demokratikoan, plangintzan eta garapen jasangarrian. Hiru zutabe horiek gidatzen dute gure eguneroko lana eta Urretxuren etorkizuna elkarrekin eraikitzeko modua”.

Aitortza, baina baita tresna ere

ELoGE ez da sari sinboliko bat soilik: hobekuntzarako tresna praktikoa da. Ebaluazioak udalaren indarguneak agerian uzten ditu eta, aldi berean, aurrera egiteko bide-orri argia eskaintzen du, zerbitzu publiko eraginkorragoak, gardenagoak eta jasangarriagoak bermatzeko.