11-17 urte bitarteko nerabeei aisialdi eskaintza egituratua eskainiko die esperientzia zabaleko lan talde berriak
Urretxuko Udaleko Gazteria Sailak nerabeei zuzendutako eskaintza egituratu du ikasturte berri honetarako. Egituraketa horren ardatzetako bat da Gaztebidean 12-17 urte bitarteko nerabeentzako zerbitzuaren eraberritzea. Lan talde berria du Gaztebideanek irailaz geroztik, eta aisialdi hezitzaile egituratua eskainiko die bertaratu nahi duten nerabeei. Lan talde berria esperientzia zabalekoa da, Gipuzkoan antzeko zerbitzu ugari kudeatzen ditu. Gazteria Saila eta lan talde berria eskuz esku, etengabeko harremanean, ariko dira nerabeei gogo eta beharretatik ahalik eta eskaintzarik osoena eta erakargarriena eskaintzeko.
Urretxuko Iparragirre Plazan du egoitza Gaztebideanek, eta lokala bera ere eraberritzen ari dira erabiltzaileen profila ahalik eta zabalena izan dadin. Hiru hezitzaileko lan-taldea ariko da nerabeak dinamizatzen, eta parte hartze bidez osatuko dute hilez hileko eskaintza. Eskaintza ez da lokalera mugatuko: lokala epizentro izango bada ere, herri osora zabalduko dute eskaintza, eta hainbat irteera ere antolatuko dituzte ikasturtean zehar, opor-sasoietan bereziki.
Bakarka zein taldean baliatu ahalko da zerbitzua beti; hori bai, izena ematea beharrezkoa izango da. Gaztebideanera gerturatuta eman ahalko da izena. Asteazkenetik igandera izango da zabalik: asteazkenetan, ostegunetan eta igandeetan, 16:30etik 20:00etara; eta ostiraletan eta larunbatetan, 16:30-20:30era. Zalantzak lokalean bertan, 747478727 telefonoan edota Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidean argituko dituzte.
Santa Anastasia Jaietan, 18an, giza-futbolina
Zerbitzua ezagutarazten dihardute egunotan Gaztebideaneko hezitzaileek. Irailaren 14ean eta 15ean ikastetxez ikastetxe eta gelaz gela ariko dira nerabeei zerbitzuak eskainiko diena partekatzen. Horretaz gainera, egun horietan eta baita datorren asteko arratsaldetan ere zerbitzua bertatik bertara ezagutzeko zerbitzua izango dute nerabeek lokalera gerturatuta. Santa Anastasia jaien baitan, Kuadrilen Egunean, hilaren 18an, giza-futbolina ere antolatu dute Iparragirre Plazan, 12:00etatik 14:00etara, festarekin bat egin eta zerbitzua ezagutarazteko.